OPEN CALL: DEEP WATER

Annet

DATO OG TID:

07.09. - 30.09.

STED:

Vadsø

INFO:

vadsokunst.no

OPEN CALL: DEEP WATER/ČIEKŊALIS ČÁHCI/SYVÄ VESI/DYPT VANN

Makkár rolla lea dáidagis, kultuvrras ja kreatiiva surggiin bistevaš, dynámalaš ja ceavzilis guovloservodaga huksemis? Čáhcesullo dáiddasearvi, Varanger-festivála, Čáhcesullo guossestudio (TFFK), Lappi dáiddáriidsearvi ja Suopmelaš-norgalaš kultur-instituhtta bovdejit dáiddáriid oassálastit ođđa rabas ohcamii.

Ohcan lea rabas ámmátdáiddáriidda dahje dáiddárjoavkkuide Suomas dahje Suoma Lappis sihke dáiddáriidda, geat álgo álggos eai leat eret dáid guovlluin, muhto identifierejit iežaset davvi ássin, go leat jogo orron davvin dahje sis lea juogalágan oktavuohta davás.

Rabas ohcamis ohcat báikái čadnojuvvon prošeavttaid, mat ollašuhttojuvvojit Čáhcesullos Varanger-festivála áigge borgemánus 2023. Válljejuvvon dáiddár dahje dáiddárat bovdejuvvojit maid guovtti vahku residensii Čáhcesullo guossestudioi ođđajagimánus 2023. Rabas ohcama ulbmilin lea ovddidit ovttasbarggu ja ságastallama rájáid rastá Norgga ja Suoma davviguovlluin. Mii roahkasmahttit dáiddáriid searvat ságastallamii Čáhcesullo báikkálaš servošiin.

Evttohusbivdaga fádda
Norgga ja Suoma davviguovlluid guovdu leat olu deaddagat, go olbmot fárrejit gávpotguovlluide čađat lassáneaddji gávpotássama ja politihka boađusin. Dutkamušain, main lea dutkojuvvon, mo dán ovdáneami sáhtašii bissehit ja doarjut olbmuid fárrema ruovttoluotta dáid guovlluide ja ovddidit guovlluid nanusmuvvama, lea buktojuvvon ovdan čáhcešaddadeapmi, turisma, bieggafápmu ja sullasaš suorggit čovdosa oassin. Muhto leago dát ovdáneapmi bistevaš? Mo guovllu olbmuid beaivválaš eallima šládja ja  guovllu kultuvrii ja olmmošlaš návccaide laktáseaddji fitnut sáhttet doaibmat vejolaš áhtanuššama gáldun? Leatgo dát resurssat oktasaččat rájáid rastá ?

Vaikke oktavuohta ja ovttasbargu Suomain leamašan historjjálaččat nannosat, dálá politihkalaš dilis riikkat fertejit bargat ovttas eanet go goassige ovdal. Mii jáhkkit, ahte dáidagis lea dehálaš rolla positiivvalaš ovdáneami doarjumis ja háliidit nannet  dáiddalaš ja kultuvrralaš ovttasbarggu davvi guovlluin. Dán ohcama guovddážis lea dán gažaldaga guorahallan.

Dáiddárohcama ulbmil:

  • Ollašuhttit olgodáhpáhusa, mii lea čadnojuvvon báikái ovttas báikkálaš servošiiguin.
  • Ovddidit báikkálaš servodaga ja servošiid positiivvalaš ovdáneami.
  • Lasihit Varanger-festivála árvvu čađahemiin dáiddaprošeavtta báikki alde

Guovllu birra
Romssa ja Finnmárkku guovllu eamiálbmot lea sápmelaččat. Guovlui leat maŋŋelabbos ásaiduvvan maid dážat, Norgga suopmelaččat ja kvenat. Guovlu lea máŋggakultuvrrat ja dát sierra kultuvrrat ovttastuvvet doppe. Lea dehálaš, ahte olbmot sáhttet seailluhit ja buktit ovdan iežaset kultuvrra ja ovddidit dáidageaset ja kulturalbmoneamiset.

Čáhcesuolu lea smávva gávpot Várnjárggas, Várjavuona rittus. Vaikke vuotna lea biologalaš máŋggabealatvuođa dáfus jáhkkemeahttun rikkis ja doppe leat máŋggalágan guolit ja njiččehasat, liigebivdu lea áitán luonddu. Máŋggat hárvenaš Várnjárgga šlájat leat dál váras ain geahppánit dahje jávkat.

Čáhcesuolu lea Finnmárkku leana oaivegávpot, ja dan leat atnán kvenakultuvrra oaivegávpogin, go dat 1800-logus lei Davvi-Suomas, Ruoŧas ja Ruoššas boahtán suomagielat sirdolaččaid guovddáš. Guhttalogi proseantta ássiin lei suomagielat, sin maŋisboahtit dovddastuvvojit norggasuopmelažžan ja álbmotlaš vehádahkan, kvenan.

Áigedávval:

7. čakčamánus 2022: Evttohusbivdda rahppojuvvo
30. čakčamánus 2022: Ohcanáigi nohká
31. golggotmánus 2022: Dáiddáriid dahje dáiddárjoavkkuid válljen
16.-30. ođđajagimánus 2023: Resideansabadji Čáhcesullo guossestudios
9.-12. borgemánus 2023: Báikái čadnojuvvon dáiddafitnu ollašuhttin olgun Varanger-festivála áigge.

Veahkkeruđat ja goasttádusat:
Mátke- ja ássangolut Čáhcesullos guovtti vahku áigge ođđajagimánus ja ovtta vahku áigge borgemánus 2023 buhtaduvvojit. Veahkkeruđa sturrodat lea 20 000-40 000 Norgga kruvnnu. Materiálagoluid buvttadeami ferte ohcat eará gálduin.

Resideansa:
Resideansa lea orrunvisti ja studio, ja dat heive ovttas golmma dáiddárii. Visttis lea smávva prentenmášiidna ja uvdna. Guossedálu oamastit Romssa ja Finnmárkku leana virgeoapmahaččat. (Liŋka vulobealde)

Čujuhus: Hvistendalsgate 57, N-Čáhcesuolu, Norja.

Ohcankriterat:
Rabas ohcan lea oaivvilduvvon suopmelaš dahje Suomas orru ámmátdáiddáriidda dahje dáiddárjoavkkuide, ja dáiddáriidda, geat atnet iežaset davvi olmmožin. Ohcamušas galgá buktit ovdan:

  • oktavuođa ja beroštumi davviguovlluide
  • ahte ohccit identifierejit iežaset davvi olmmožin nu, ahte sii jogo orrot davvin dahje sis lea oktavuohta davás
  • vásáhus searvvuš dáidagis dahje báikái čadnojuvvon prošeavttain ja
  • báikái čadnojuvvon olgodáiddaprošeavtta Varanger-festivála áigge

Ohcamuš:
Ohcamuša sáhttá sáddet PDF-hámis čujuhussii vadsokunst@gmail.com 

Ohcamuš galgá doallat sisttis:

  • čilgehusa beroštumis
  • prošeaktaplána (namma, oasseváldit, ulbmil, eanemustá ovtta siiddu guhkkosaš čilgehus)
  •   ovdamearkkaid ovddit bargguid birra
  • mátkeplána ja bušeahta
  • CV

Ohcamuš galgá leat čállojuvvon eaŋgalasgillii. Ohcanáigi nohká čakčamánu 30. beaivve 2022.

Duopmárat:
Oasseváldiid vállje joavku, mas leat mielde ovddasteaddjit Čáhcesullo dáiddasearvvis, Varanger-festiválas, Čáhcesullo guossestudios (TFFK), Lappileana Dáiddársearvvis ja Suopmelaš-Norgalaš kulturinstituhtas.

Eanet dieđut:

Váldde  oktavuođa Monica Milch Gebhardtii Čáhcesullo Dáiddasearvvis
vadsokunst@gmail.com dahje +47 97153929

Read the open call in English here.

Oassebeliid birra:

Vadsø Art Association (Čáhcesullo dáiddasearvi)
ovddida dáidaga ja dáiddalaš ovttasbarggu báikkálaččat, guovllus ja rájáid rastá Čáhcesullos Norggas. Mis lea čájáhussadji, prošeaktasadji ja dáidda ja duodje buvda Gallerikioskkas Čáhcesullos.

Vadsø guest studio (Troms and Finnmark County Authority) Čáhcesullo guossestudio

The Artists ́ Association of Lapland (Lappi leana dáiddáriidsearvi)
buktá ovdan ja ovddida dálá dáidaga, mii lea dahkkon Lappis ja ordne čájáhusaid Suomas ja olgoriikkain.  

Varangerfestivalen – the Varanger festival (Varanger-festivála)
sierralágan genreid jahkásaš musihkkafestivála Čáhcesullos vahkus 32. Varanger-festivála čalmmustahttá earenomážit davvi guovllus orru musihkkáriid ja dáiddáriid buvttadusaid, mat leat dahkkon festivála váras.

The Finnish-Norwegian Cultural Institute (Suopmelaš-norgalaš kultur-instituhtta)
Ovddida ovttasbarggu, ságastallama ja lihkadeami Suoma ja Norgga dáiddáriid ja kulturdoaibmiid gaskkas.